勁食勁玩碧桂園

今年重陽節我地吾係去登高係去左《碧桂園》
我地四劍俠趁假期前一放工搭夜車上去！今次因為行
《深圳西部的深圳灣口岸》所以要去灣仔上車！
心唸：新路線應該會快d到！我地搭六點半直上碧桂園！點知等到六點十先有車到！原來車程行經《渣兜馬拉蟲》全馬路線！
一路坐一路睇！嘩！原來我地跑左咁遠架！沿途經過團門公路！
又塞左一陣車！好彩好快通番！
之後髮髮聲就到深圳西部的深圳灣口岸！個口岸好大呀！一岸兩關好方便！
吾駛上車又落車咁煩！
可能係星期四晚無乜人晨咁早就過關番大陸！所以排兩三個人就順利完成！正！
之後又上番車直達《碧桂園》！
我地梗係第一時間去呀《巧玲姐啦》！都係不算多人！一到就有位！
大家都係食《鮮奶炖海底椰雪梨》
食飽飽就番屋快些沖涼之後早些休息！準備明天行程！
小茜話：第二日吾想咁粗勞！想舒舒服服休息下！所以今日會就休休閒閒抖下啦！
梳洗完畢就去花園酒樓飲早茶先！
飲杯茶食件點心！幾歎呀！好耐無慢慢嗒真杯茶！
飲完早茶去菜市場買定今晚燒烤食物！

之後再去豪苑游下水先！個泳池又無乜人！又可以包池！幾爽呀！
吾會人頭湧湧游都游吾到！係無乜人游水又享受左一小時太陽浴啦！游完水沖洗完!

當由泳池離開會所之際！小雲竟然嘩一聲！我就朝著佢望的方向睇下做乜﹖
原來見到一個好大的咸蛋王！即刻叫太子威影低去！因為我無帶相機！
當影影下之際竟然有個酒樓職員走埋黎同我地講！呢面影仲靚呀無野阻架！
我地四條友咪照跟佢入去！真係好靚呀！我地個個都眼金金望實個太陽！
《可能個職員心唸：呢四條港燦太陽都未見過！我地日日都係咁望啦！
都無乜特別啦！有乜好影呢﹖﹖》

之後番去準備今晚燒烤準備！平時燒烤個個都猴猴急急燒完就食！
今次可以施施然咁燒！因為大把時間一路睇電視一路燒！正！

燒雞亦我自細鐘意食

燒完又執好野清洗完地方！個個沖埋涼！仲有時間睇埋妙手人心添！

第三日！我地決定今日去番禺市橋大夫山森林公園踩單車！
所以今日早餐要食得豐富些！

食完早餐就出發去大夫山！因為離開碧桂園不遠！所以我地打的去！
未到大門口巳經見到周圍好多人踩緊單車左穿右插！又見到單人車同埋雙人車！
更第一次見的三人車！但好奇怪！三人車通常三個《麻甩佬》一齊踩喎！點解呢﹖

租好車試完車！出發囉！我地萬無目的見路就行！行行發現一個水塘！

我地就跟住個水塘踩啦！經過都幾長的斜路！見到有樹陰就停車抖抖！
休息完繼續捱埋最後的斜路！

沿途我地都會下車影下相！
踩到上山頂就係一個大草地我地再小休食下野飲下水影下相啦！

大家抖夠食夠就開始落山啦！好爽呀！全部落斜！好似坐電單車一樣！
正呀。。。。最後沖到落平路時！
再踩多陣就巳經踩左三粒鐘要還車啦！多謝每人《九蚊雞》
因為我地租左K牌女裝車！好抵玩呀！
當每個人都踩到好倦之際！個個都話去康宁啦！吾係呀！係康寧按摩中心！
按兩粒鐘之後先去食飯飲靚湯！去到康寧咁岩d按摩師父又吾夠四個！要等半粒鐘！
威少就話搵呀巧玲姐先啦！個個都話好呀！因為又有得坐下又有得食甜品！
咁佢地就叫晒姜撞奶而我就整個《蛋花紫心蕃薯糖水》都係四蚊雞咋！
大大舊紫心蕃薯成碗都係！
食完一陣去按摩！咪！砵。。砵。。。砵。。。。
食完甜品仲有小小時間就去唱片店行陣！之前又睇吾到心水戲！
點知而家又揀左兩套戲一套CD兩套卡通！滿載而歸！番到香港有排睇囉！
買完又剛剛好夠時間去按摩！今次中藥浸腳加埋按腳一個鐘，按身一個鐘！
多謝每人七十五元！
按完個個舒服晒就去葵苑食晚飯！可能今日個個都做左運動！
所以都好肚餓就叫左四餸一湯炒飯任裝！你睇幾豐富！個個扥住個肚腩走！

慢慢行番屋企！沖完涼就煲左套每當變幻時！可能我最後沖涼！
出到黎型姐威少巳經開左場好耐！又吾知頭吾知路！所以睇左一陣就無睇番房訓覺！
最後一日即係第四日！早餐照樣係屋企食！因為燒烤食物買多左又食吾晒！
所以煮埋去配通粉！其實都好飽架！
食完早餐抖左一陣之後再去超級市場買材料！因為今日係廚藝大比併！
各人要自己做一個未煮過的菜式！
因為太子威話吾煮得吾得！我好民主的！得！不過要做清潔大使囉！
係買材料之前威少型姐要去銀行攪d野！所以我地行下超級市場先！
一入到去見到放滿雪糕雪條的冰箱！唸都吾唸買支甜筒食下先！
一路食個甜筒一路等佢地！又幾爽喎！食到尾聲！
見到佢地坐村車番黎！乜咁快！我仲未食完呀！急急忙食埋入去買野！

大家各自搜尋自己的菜式材料！但威少好慘呀！無野好做！
只可以搵個位坐下等我地買完！今次又買得算快喎！好啦番屋企開工煮飯仔！
番到去大家再忙於自己工作！威少又無野做喇！
都叫你唸定個自選菜式一齊煮一齊玩呀！至少吾會悶呀！
最後佢好好人幫我地鉋走d瓜皮！真係吾該晒威少！

好啦！由於時間關係又完成晒啦！
小吉魚條甘筍青瓜卷

小雲咖哩雞+法包

型姐酸辣湯

雖然賣相就吾算太靚！但味道都吾差架！又食完又執好屋！
都差吾多四點鐘啦！最後我地執埋自己的行李去會所玩一陣！
再去食晚飯之後搭車番香港！

去到會所打左一局保齡就無玩！因為我運氣吾好！成日落坑！吾想碌錢落坑！
之後轉玩下打鼓巨機先！同真鼓差吾多！又幾好玩呀！
原來手提N機都有呢個Game玩架！玩下玩下咁就玩到七點鐘啦！

我地通常走人會去心芳園食飯！點知去到門口無開門！吾通執左笠！吾係呀馬！
我地即轉去搵巧玲姐喇！拿拿林叫左幾個小菜！之後再叫埋個甜品走人！
今次我地三人叫芝麻糊因為夠晒快呀！而型姐就叫紫心蕃薯糖水！
吾知點解今次整得咁慢架！就快八點二喇！我地八點半要搭車架！
講完呢句就即刻黎！個個都用九秒九打開個肚倒落去！之後走人！
四個人八隻腳急急腳走去搭村車出去旅遊巴總站！
去到總站剛剛八點半好彩架車未走！真係好彩！
咁就過左四日三夜碧桂園吃喝玩樂之旅！希望下次一樣玩得咁開心啦！